甚麼是命運?(二)

之前大概講過下我對命同運的定義同見解，今次我想具體咁講下所謂既命運點樣影響我地既人生。

上次講過，命係人既性格同特質，至於運就係人後天面對的變化。打個比喻, 人生就係一個交通網絡, 命就係講緊你揸咩車，運就係講緊你行邊段路。

有D人好好彩，一開始就揸法拉利(天資好)，一踩油就一支箭唔知飛左去邊; 有D人就揸部老爺車，踩極油都唔去; 有D人車都無得揸，唯有坐巴士(好似我咁)，唯有隨波逐，架車去邊就去邊。

有D人行條路咩車都無，無交通警無快相，成條路任佢玩; 有D人倒番轉，架車塞左係旺角，行兩行到燈位又停一停, 無一頭半個鐘都出唔番唻。

講到LEE度，好明顯最理想既當然係一架跑車加一條大型高速公路任你玩。

世事有無咁理想? 就算有部跑車俾係，點知塞左係觀塘道又如何? 仲要俾D綿羊仔同個單車外賣阿叔扒你頭.........

不過，講到最危險既，其實係你以為有部靚車加條靚路任你揸，但係你唔知道10秒後原來有個髮夾彎.........

係LEE條人生既大路上，其實揸得快揸得慢並唔係咁重要，安全到達終點先緊要。

大家要記住，我地而家講緊既係人生既道路, LEE條路你永遠唔會行過，路面情況你永遠唔會預知，直路彎路定塞車，係你行到先會知。

有D人天生有前膽性，對將來有種洞察力，加埋部靚車，行得又快又安全，成為你我口中既偉大人物。至於其他人，唔係揸得太快炒車，就係行唻行去都去唔到終點。

LEE種問題困擾住大部分人，於是"祿命術"(命理)因而產生。 對於困係人生旅途既人唻講，祿命術就好似俾左張地圖俾你，或者係你部車裝左部GPS，等你對之後既路有D IDEA, 邊D位俾油，邊D位要收油都有番D預算，因此亦有所謂"能知三日事，富貴千萬年"既講法。不過又咁講，就算俾個地圖/GPS俾你，堅定流、UP唔UPDATE、識唔識睇又有邊個知......